Sujet: Liggt Wolfeschiesse im Wallis?
„Wir wollen seein eein eeinich Volch von Wölfen,
es ischt im Wallis eh schon fünf vor Zwölfen!“
Es isch emool e Wolf – mit hohlem Zahn
ibere Simplon koo im Hungerwahn,
hett dert – fir d’Walliser verschisse –
deenen ihri faisse Scheefli grisse!
So wänn die denn mit wysse Hind probiere
die Härde z’schitze, s’sell nit eskaliere.
Dr schlaui Wolf hett dänggt – „was, wyssi Hind?
denn ryss ych halt vo jetzt aa au e Rind!“
Mir wänn jo d’Innerschwyzer nit verdriesse;
im Wallis gitt’s kai Derfli „Wolfeschiesse“!
S’sinn nur e paar dert wieder zämmegschtande,
und hänn sich schnäll in d’Jagdmontur lo gwande;
„Wenn z’Bärn sich niemer meh duet reege,
mien mir dä Wolf halt sälber leege!
So sinn die Lyttli – stuur und aige,
dien gärn no usse Sterggi zaige!
Die Gschicht hett sehr vyyl Parallelle;
e mängge Wolf duet au sy Nagge stelle!
In jeedem Gremium, in jeedem Gschäft
gitt’s doch e beese Wolf, wo kläfft.
Bim FCB glopft aine d’Fingge
und losst sy Ruudel vorwärts gingge.
Nur zwischedure sinn sy zahm,
dr Laitwolf Frei blybt amme lahm!
Am schlimmschten isch’s bi dr SVP,
dert hett’s scho jungi Welfli gee!
Nonem „zäche“ Blocher-Gnoche
duet jetzt dr Brunner noochebloche!
Au sottigi sinn stuur und aige,
und dien gärn ihri Sterggi zaige!
Dr Graasschmegger Maurer wird im Schloof,
im griene Gwand zem lahme Schoof!
Dr Finanzwolf isch gange, bevor sy schiesse;
ych glaub halt doch, dä haig „freiwillig“ miesse!
Au zue de Welf gheert dr Kachelmaa;
mecht’s gärn uff „sado-maso“ haa!
In Rom, dert setzt dr hailig Babbe
uff’s Bischoff-Haupt e rooti Kabbe;
är schloot bi dr letschte Welfli-Wahl
dr Koch zem neye Kardinal!
Sone klerikaali Rudel-Bindig
ferderet schynt’s d’Scheefli-Findig!
Wie d’Walliser, wo stuur und aige
no usse gärn dien Sterggi zaige!
Dr Wolf isch doot – sy reede vo aim,
und maine, dr Räscht gieng vo sälber haim!
Dasch gnau sone Määrli, wo kennt haisse,
„dr beesi Wolf und de siebe Gaisse.“
Me froggt sich halt in de letschte Daage,
wievyyl Welf denn s’Wallis no ka verdraage?
Dr greescht Wolf mit sym schlymige Gschnatter
isch doch dä FIFA-Halbgott Blatter!
Wie dä machthungrig wirblet und spinnt;
das isch sone typische Walliser-Grind!
Ebbe die, wo so stuur und aige,
gärn ihri Macht und Sterggi zaige!
Au e gfrässige Wolf, wo im Wallis sich bettet,
und doch s’ganz Joor in dr Wält ummejettet,
isch vom FC Sion dä Preesi-Dyssi;
me spieelt en am beschte diräggt in d’Schyssi!
Dä Playboy, wo d’Maitli duet ummeschmaisse,
kennt gradso guet „Wolfsmaa“statt Hirschmaa haisse¨!
Und dr Federer hett ganz verbisse
aimool meh dr Nadal „grisse!“
Nit z’letscht hämmer z’Basel, me kennt iberhitze,
mitem Morin au e schwarzes Schoof an dr Spitze;
dä stoht doch als Hobby akkuraat
Modäll fir’s SVP-Scheefli-Plakaat!
Zem Gligg isch dr Wolf nit bi uns aanegsässe,
dä hätt soo schwarzi eh nit gfrässe!
Grad wie d’Walliser, wo stuur und aige,
allewyl gärn ihri Sterggi zaige!
Denn nonemool, Wolfeschiesse, das waiss doch e Jeede,
liggt nit im Wallis – me merggt’s scho am reede!
Friehner sinn d’Kanteen halt no zämmekoo,
d’Walliser wänn’s lieber ellai durestooh!
Sy sagen em Räschte gärn „Üsserschwiiz“,
drbyy sinn grad die fir die andere s’Gryyz!
Am Simplon baut me – es isch zem gryyne,
en aisyttygs Katzedirli yyne.
So ka dr Wolf denn numme no uuse
und z’Italien ääne wieder go pfuuse!
Aber – me waisses – e Wolf isch nur doot,
bis dr näggscht wieder vor dr Flinte stooht!
So sinn sy, d’Walliser, stuur und aige,
dien gärn ihri Macht und Sterggi zaige!
Dr Laitwolf vo dr BaZ – dr Somm
isch schynt’s au nit so Scheefli-fromm!
Dr neyi Bsitzer mecht en gärn bhalte;
so duet me d’Lääsermainig spalte!
Wo isch dr Sutter äggscht die vyyle Batze
im Basler Daig go zämmegratze?
Uff allfäll maint är zue sym Danti;
„Ych willen nimm, dä Tettamanti!“
Und dangg dr Abstimmig hett är denne
dr Blocher au grad ussschaffe kenne!
Sone Sutter kennt – me schiggt sich dryy,
grad so guet au e Walliser syy!
Die sinn halt eso, mächtig und aige,
und dien gärn ihri Sterggi zaige!
Mir Querschleeger hätte do grad no z’brichte,
dass mir uff unsere Laitwolf mien verzichte!
Är fählt das Joor in unserer Mitti,
an synere Stell ziehn mir jetzt e Ditti.
Kai Schuss hetten droffe – mach dr kaini Sorge;
är daucht wieder uff am Donnschtig demorge!
Drotzdäm mechte mir halt en Ainhait syy,
drum isch är symbolisch als Wolf drbyy!
„So wollen wir seein eein eeinzich Volch von Wölfen,
doch beei uns ischt es noch nicht fünf vor Zwölfen!“
Image URL: http://old.debing.de/34514-baseler-morgestraich-querschleeger
